حَجَر تـرشيد

إكتشفت إحدى البعثات الأثريه أثناء تنقيبها عن الأثار في منطقتي الرحاب و مدينتي الأثريه، حجرا ضخما الرخام، كتب عليه بعض النصائح و الارشادات التي قد تكون سببا رئيسيا في الكشف عن تفاصيل مثيرة للحقبة السوداء، والتي مرت بها مصر في أواخر القرن العشرين، وحتى منتصف القرن الواحد و العشرين.

و قد إستطاع أحد العلماء المصاحبين للبعثه، فك شفرة الرسومات التي كتب بها الحجر و التي تكونت من حروف إنجليزيه و أرقام تشير في رسوماتها الى لغة ثالثه ليست إنجليزيه وليست أيضا لغة رياضيه، وانما لهجه مصرية  قديمة إستنبطت رسوماتها من تلك الحروف والارقام.

و بعد محاولات جاهدة من علماء البعثة الأثريه، استطاع احد العلماء ترجمة تلك الرموز و الأرقام والتي تبين فيما بعد انها بعض النصائح و الارشادات التي كتبها احد الموظفين الكبار في الدولة في ذلك الوقت لتكون ارشادات تتبع في ذلك العصر.

تكون الحجر من ثلاثة اجزاء:

يحتوي الجزء الأول على إرشادات تم توجيهها للعاملين في الدولة حيث نصحهم الباش-كاهن بالحرص على إقامة الأحتفالات على الاضائات الكبيرة لسفح الهرم و اضائة مباني كورنيش النيل بالأنوار المبهرة المبهرجه كما نصحهم الباش-كاهن بالحرص على تصدير الكهرباء للأردن ولبنان، و هما دولتان كانتا جارتان لمصر في تلك الحقبة قبل غرق دلتا مصر بسبب ما تعرضت له الارض من إحتباس حراري ، لم تفطن مصر لخطورته إلا بعد ان تآكلت اجزاء منها.

يحتوي الجزء الثاني من حجر ترشيد على إرشادات تم توجيهها للبسطاء من الشعب لتفادي الإسراف في إستهلاك الكهرباء حيث نصحهم الباش-كاهن بالإنصياع لوجود ضغوط على إستهلاك الكهرباء في مصر و بالتالي الرضا بإطفاء أضواء الإنارة في الشوارع و العمل على زيادة الفساد المتأصل اساسا في الشارع.

كما دعى الباش-كاهن السكان الى تقليل إضاءات بيوتهم و العمل على تقليل قوة أجهزة التكييف الخاصة بهم"ان وجدت" .حتى لا يحدث ضغط على الكهرباء في مصر .. تمنع القائمين على إقامة حفلات مارينا و الساحل الشمالي من إقامة حفلاتهم و تسليه المصيفيين.

اما الجزء الثالث من الارشادات الموجوده على حجر رشيده لم يتم تحليل معناه حتى الآن حيث و جدت بعد الحروف الناقصة بفعل الزمن حيث تكونت تلك الإرشادات من ثلاث مقاطع صوتيه فقط

كان المقطع الثالث منها هو كلمة China

ماريـــونــيت

اتفقت عرائس الماريونيت على أن تخرج عن صمتها و أن تثبت لكل الناس أن لها شخصيتها المستقله،

و بالفعل بدأت في وضع خططها لتقوم بتغير تحركاتها على خشبه المسرح أمام الجمهور.

و مع بدايه العرض، بدأ الهرج و المرج يسود أرجاء خشبة المسرح و تتحرك عرائس الماريونيت يميناً و يساراً.

فزاد انبهار الجهور بتحركات العرائس الرائعة على خشبه المسرح، ويزيد تصفيق الجمهور للعرائس المحترفه. والتي تعلمت الكثير من سنوات عملها داخل المسرح.

تخرج احدى الماريونات من بين حشد العرائس على خشبه المسرح لتصيح في الناس و تنصحهم أن يتّبعوا خطواتهم، وأن يثوروا على كل من يقيد تحركاتم فيزداد حماس المتفرجين و صيحاتهم.

تزيد الماريونات في ابهارها للناس بتحركاتها الرائعه و رقصاتها المتقنه، و بث الحماس في الناس ليخرجوا عن صمتهم، ويطالبوا باستقلاليتهم عن كل من يتدخل في تحركاتهم و حياتهم.

و تبدأ مخيلات الناس في عكس موقف العرائس على نفسها، فيحاول ذلك الرجل الانيق ذو البالطو الكحلي في تخيل نفسه ذو كلمة مسموعه في حزبه السياسي مستقلا عن الاوامر التي تملى عليه، ليرضي ضميره وينطق باراء صادقة، فتظهر على وجهه ابتسامه واثقه من النجاح.

و يبدأ ذلك الرجل السمين في تخيل نفسه قادرا على مواجهة زوجته و أوامرها و تصرفاتها في كل ما هو خاص به ، و قدرته على رفع صوته و المطالبه بكامل حقوقه، فيأخذ نفسا عميقا مليئا بالثقه و الحماس.

و بدأت تلك البنت الشابه ذات الملامح الرقيقه في تخيل حياتها دون سطوة الأهل و تعنّتهم في كل ما يخصها من دراسه و عمل و حتى الزواج، لتتخيل نفسها ذات شخصية مستقله تتمتع بكامل ما يتمتع به أخوها الجالس بجانبها في دار العرض، و الذي بدوره تمنى ان يكون محل احدى عرائس الماريونيت التي تستطيع ان تختار عملها و مستقبلها و تحركاتها و تتمتع باستقلاليه كامله عن كل ما يخص حياته من تعب و كلل و مصاريف في كل الاتجاهات،

والتي تجعله بعيدا عن كل الأنشطه الأنسانيه و التي هي كفيله بالتفريق بين العمل بالنسبه للأنسان و العمل بالنسبة للحمار.

و خلال كل تلك الفترة التي أنشغل بها المتفرجون في تخيلاتهم و أحلامهم بالاستقلاليه، انتهى العرض المسرحي، ليخرج المتفرجون ليمارسوا الحياة العاديه لعرائس الماريونيت، و التي اكتشفت بدورها انه امتعت و اقنعت و تألقت في عرضها المسرحي و الذي كان بعنوان " تمرد الماريونات".

نداء الى الجاليه المصريه داخل مصر

من فترة كده كنت بفتح جورنال الاهرام .. لقيت اعلان من الحكومة الايطالية لجميع الايطاليين في مصر

بتحثهم فيه على التوجه الى السفارة الايطالية .. للمشاركة الفعالة في اختيار رئيس وزراء جديد لايطاليا .

و عليهم ابراز جوازات سفرهم وبطاقاتهم .. للمشاركة في الانتخابات الايطالية ..

ولما فتحت الاخبار .. تاني يوم ..

لقيت نفس الاعلان ..

اللي كان موجود ايضا في المصري اليوم .

و لمـّا فكرت شوية ..

بدأت اسأل نفسي ..

ياترى بيصرفوا كام على اعلان زي ده في دول العالم المختلفة ..

يعني اعلان عن انتخابات ايطالية والاقتراع في السفارة الايطالية .. لدى جمهورية مصر العربية .

في 3 جرايد مصرية كبرى ..

ده معناه .. ان على القليل .. 150 الف جنيه في مصر ..

يعني حوالي 25 الف دولار ..

لما نضرب المبلغ ده .. وده مبلغ اساسا مصري ..

يعني استحالة يكون الاعلان بالمبلغ ده في الدول التانية ..

يعني الاعلان في جورنال في اليابان مثلا .. ممكن يتكلف 40 الف دولار بنفس الحجم ده

"وده في جورنال واحد بس"

ولازم تكون حاجز قبله بشهرين ..

احنا بنقول بالمعدل المصري

لو ضربنا مبلغ 25 الف دولار في على الاقل 150 دولة

يبقى الناتج ..

حوالي 4 مليون دولار في اليوم

وده طبعا بقليل القليل ..

انا ساعتها قلقت .. اكيد الايطاليين دول معاهم فلوس ..

بس واحد صاحبي قالي لا يا غبي ..

دي الدول المحترمة كلها بتعمل كده ..

قلتله يعني احنا بنعمل كده ؟؟

قالي بقوللك الدول المحترمة ..

قلتله تقصد ان احنا دولة مش محترمة ؟؟ .. قالي لا ما تودينيش في داهية ..

انا قلت انهم هما اللي محترمين ..

قلتله طيب هي ايطاليا بتعمل كده ليه ؟؟ يمكن معاهم فلوس زيادة ؟؟

قالي لا

لأن ايطاليا دولة بتحترم مواطنيها في كل دول العالم ..

طالما معاه باسبور ايطالي .. يبقى ليه حق على الدولة

قلتله يعني دولتنا مش بتحترم المهاجرين المصريين .

قالي اساسا مش بيحترموا اللي جوه مصر ..

قلتله ايه ده .. !!

هي مش الانتخابات اللي بيقولوا عليها دي بتبقى للناس اللي برة الدولة بس؟؟؟ ..

قالي لأ طبعا ..

قلتله اومال عندنا مش بيعملوهالنا ليه ..؟؟

قالي لأ .. هما بيعملوها .. بس مش بتقدر تصوت غير لما تموت ..

قلتله انا اعرف ان اللي بيموت بيصوّتوا عليه مش هو اللي بيصوت ..

قالي لأ .. في مصر .. الميت هو اللي بيصوّت ..

قلتله يعني الميتين مش بيصوتوا في ايطاليا .. ؟

قالي لأ .. ماهو ده ضمن احترام المواطن .. لازم المواطن يقول رأيه وهو حي ..

قلتله يمكن عندنا بيدوروا علينا لما نموت علشان نقول رأينا اللي ملحقناش نقوله واحنا عايشين ..؟؟

قالي ما تجننيش .. انت لا بتقول رأيك وانت حي .. ولا وانت ميت ..

قلتله .. طيب ليه مش بيعملولنا اعلانات علشان نعرف معاد الانتخابات ..؟؟

قالي لأ بيعملوا ..

قلتله يبقى احنا محترمين ..

قالي انت رحت انتخابات قبل كده ؟؟

قلتله لأ ..

قالي ليه ؟؟

قلتله لأن لازم يبقى معايا بطاقة انتخابية ..

قالي وليه مش معاك بطاقة انتخابية ؟؟

قلتله لان ممكن اطلعها خلال شهر واحد بس خلال السنه

قالي يبقى ده احترام ؟؟

قلتله اه طبعا .. احنا بس اللي مش بنلحق نطلعها في الشهر ده ..

قالي ليه ؟؟

قلتله علشان انا مولود في الدقي .. وعايش في النزهه ..

لما اروح القسم في النزهه .. يقولولي لأ .. من محل الولاده ..

ولما اروح محل الولاده .. يقولولي لأ .. تطلعها من مكان السكن في البطاقة .

وبصراحة انا حاولت لمدة 15 يوم ..

وقعدت اتعالج من التعب لمده 15 يوم .. فما لحقتش ..

قالي وده يبقى احترام ؟؟

قلتله اه طبعا ..

الدولة مالهاش اي ذنب في ان انا تعبت .. من المشاوير بين النزهه والدقي ..

قالي بقوللك ايه ..

انا زهقت منك .. انت مش فاهم حاجة ..انت غبي

قلتله ليه يعني.. شايفني جبت 14% في ثانويه عامه زي ناس؟؟

الراجل اغمى عليه و غاب عن الوعي

هو انا قلت حاجه؟؟

كــش ملـك

مش كل الناس دلوقتي مقتنعه ان في حب، و النقاش الطبيعي في الموضوع ده بين الناس بينتهي بأن في حب، لأ

ما بقاش في حب، لا والله لسه في حب، هو في حد بيحب حد دلوقتي؟

في مجتمع الشطرنج، اقوى كائن شطرنجي هو الوزير

وده بأجماع من الطابيه و الحصان و الفيل، و الملك نفسه

الوزير ممكن يقف في خانه، يسيطر بيها على الماتش كله و (كش) مات الملك و انتهى الماتش

و ممكن نفس الوزير، يقف على نفس الخانه، و يبقى زي الاهبل و تكون نهايته على يد عسكري معفن

و احيانا على يد تحالف.. بين اتنين عساكر برده معفنين

طيب ايه الفرق؟

الوزير هو الوزير

و الخانه نفس الخانه

طيب ايه اللي حصل؟

اللي حصل ان الوضع كله مختلف، و اللي بيلعب حرّك الوزير بدون ما يفكر او بدون ما يقدّر ذكاء اللي قدامه او يمكن حتى يكون شاف واحد كسب قبل كده لما الوزير اتحط في الخانه دي.. فبيقلد

هو ده الحب

انت نفسك انت

و الحب نفسه الحب

بس وضع الماتش مختلف، و اللي بيلعب معاك مختلف

ولو اللي بيلعب معاك فاهمك كويس و عارف دماغك، هيبعدك عن الخانه دي بكل قوته

ويفضل الماتش يروح و ييجي

و يبعد و يقرب

و تتحرك الخانات كلها و خانه الفوز فاضيه

لغاية ما يوصل الوزير للخانه المطلوبه و في اللحظة المناسبه

و ساعتها

هتكسب اجمد ماتش لعبته في حياتك

لأنك لو خلصت الماتش في 5 دقايق

مش هتفتكر اساسا الماتش ولا كان مين اللي بيلاعبك

انما الماتشات اللي بتعيش.. اللي بيكون فيها مجهود كبير، وتفكير كبير و احترام تفكير المنافس

و اخذ و عطاء

ولما بيخلص، بتحس انك فخور باللي وصلتله وكسبت حب و احترام اللي بيلاعبك

وكسبت احترامك لنفسك و لتفكيرك

و كسبت احترام الناس كلها اللي بتتفرج

حب بتفكير، في كل قطعة شطرنج و في كل خانه و في كل خطوة

و اعطيها حقها من تفكيرك

و ساعتها هتطلع من الماتش.. هتنسى الماتش وهتكسب الشخص اللي لاعبته

وما تلاعبش واحد غبي.. علشان هتطلع من الماتش كاره الوقت اللي ضيعته والشخص اللي ضيعت معاه وقتك

و الناس اللي بتتفرج هتستغرب انك رضيت تلاعب واحد غبي

ده كمان الطابيه هتكرهك 

وما تستهينش بتفكير اللي قدامك

علشان مهما كنت وزير في مملكتك

ممكن عسكري معفن يخليك بره اللعبه

او حتى تحالف.. بين اتنين عساكر .. برده معفنين

مش أسير

لو كنت صاحي و فجأة نمت

وصحيت لقيت نفسك في بيــر

حاول ما تصحاش .. ولو حاولت

حتندم انك يوم صحيت

فكّـر و آنس وحدتك

حاول تغني بصوت جهير

و أسمع بودنك ضحكتك

واضحة و صافيه و فيها خير

حاول تدمع.. أو تبكي .. أو تنوح

حاول تعيط من ألم كل الجروح

و ارجع بسرعه لقوتك

و امسح بايدك دمعتك

و اخلق في نارك .. جنتك

و اوعاك تحس انك أسير

ده الأسر انك تنسى فرحك

و في الألم تنسى الدموع

الأسر انك تنسى صوتك

و تنسى شكلك في السكوت

حاول تفكر تبقى طير

و طيـــر

بس ما تفارقش بير

علّمك ازاي تطيــر

ده مهما كان البير صغير

افضل كتير

من يوم ما تصحى

وتكتشف .. انك أسير

بوسة بطــوط

و أنا صغير، كان عندي عربية بوليس لعبه .. بالزمبلك (الزمبرك باللغه الفصحى)، وكنت بفضل ألف الزمبلك بتاعها مرة والتانيه والتالته و اسيبها.. و أفضل اتفرج عليها بتجري يمين و شمال.. الانوار قويه.. الصوت عالي جدا.. واحده واحده بتبدأ تهدى و الصوت يضعف و يقل جنونها.. و بعدين تقف في سكون.

انا فاكر كويس جدا اني لما كنت بلف الزمبلك مكنتش باخد بالي من اي حاجه ف العربية غير صوتها و جنونها.. بتتحرك يمين و شمال، و بتخبط في كل ارجل الكراسي بجنون غريب، ولما تقف و امسكها تاني ابدأ اخد بالي من حاجات جميله كتير فيها.

ابدأ اخد بالي ان رسمة الابواب جميله جدا، في ناس جوه العربية، السرينه فيها لمبه صغننه اوي، رقم تليفون البوليس مكتوب على الابواب، واجهة العربية، واكتشفت بردو ان المرايات الجانبيه فيها فعلا مرايات و صغننه اوي.

ولما كبرت و بقيت ثورجي.. وعرفت يعني ايه ثورة، و عاصرتها، و تأثرت بكل مراحلها، بدأت افتكر عربية البوليس الصغيره، لما شفت كمية الكلام ..الكلام .. الكلام.. اللي الناس بتتكلمها دلوقتي.

الناس فرحانه انها ما بقتش تخاف تقول رأيها، اينعم الموضوع فوضوي جدا.. بس لازم نعذر بعض، احنا بقالنا 30 سنه بيحصلنا شحن، بقالنا 30 سنه ما بنقولش رأي، أو بنقوله و نتحبس، او بنقوله و ما يتسمع.. احنا بقالنا 30 سنه بيلفوا الزمبلك بتاعنا.

وفجأه.. قامت الثورة

و بدأت الناس تتحرك بجنون زي عربية البوليس.. تتكلم كتير.. اراء كتير و متسارعه.. افكار كتير عايزين ننفذها.. طلبات كتير مكناش بنعرف نطلبها.. بنتحرك يمين بجنون.. و نتحرك شمال بجنون.. و بنخبط في كل ارجل الكراسي.

بدأنا بنفرح بالهجوم على رأي.. و نفرح بنقد رأي.. و نفرح بتلاقي اراء.. و نفرح بترابط افكار.. لأ ، احنا اصلا بدأنا نفهم يعني ايه افكار.

فوضى فوضى فوضى ايديولوجيه.

انما دائما العقل ما بيستحملش الضغط الزياده.. و تدريجيا هيبدأ يهدى و يهدى .. ويبدأ يسمع و يتناقش.

هتبدأ العقول تظهر اجمل ما فيها.. زي عربية البوليس بتاعتي.

هنبدأ قريب نعرف فايدة اللي احنا عملناه و نجني نتايجه الرائعه.. اهمها حرية الرأي.

الناس فعلا بدأت تفرح انها بتقول رأيها.. ودي حاجه رائعه.. هيبدأ يتكلموا يتكلموا .. و بعدين هيتعلموا يسمعوا و بعدين يتكلموا.

لفت نظري واحد من كتر ما هو بقى حاسس بحرية الرأي.. و قادر ينتقد دون خجل

انه ساب الدنيا كلها و بدأ في نقد احد دور النشر  بسبب حاجه غريبا جدا.. انه لقاها بتغير في مجلة ميكي قبل ما تنزلها السوق.. القصص بتاعت وولت ديزني بتتغير و مش بتجيلنا زي ما هي. طب لييييييييييه

ازاي بطوط ياخد بوسه شريفه عفيفه بسبب منعه سرقة شنطه لأحد المادموزيلات الجميلات

و دار النشر تركب الصورتين تاني .. بحيث يظهر بطوط دايخ من البوسه مع ان المادموزيل مش بصاله اساسا

وبدأ يصرخ الراجل .. انا بعترض على تعديل النسخه العربية؟؟ دار النشر خايفين من ايه؟؟ بطوط هيفتنا مثلا؟؟

و بدأ يربط ده بمحاولات الأخوان المسلمين السيطرة على الرأي.. و محاولات السلفيه تضييع حقوق النشر.. و بدأ يكون عنيف في هجومه و رأيه.. و أنا هموت من كتر الضحك

شفتوا كتر لف الزمبلك بيعمل ايه؟؟

بس نحمد ربنا ان الزمبلك ما اتكسرش خلال 30 سنه

و أننا لسه قادرين نتكلم تاني و عندنا عقليات تبنيلنا من الأول و جديد

صدقوني يا جماعه.. الفوضى مسألة وقت.. نتيجه حرمانا من السنتنا

بس بمجرد ما نتأكد من ان كل واحد لسه عنده لسان هيقدر يستخدمه ف أي وقت

هترجع الأمور لطبيعتها.. ونستمتع بنتائج ثورتنا