نداء الى الجاليه المصريه داخل مصر

من فترة كده كنت بفتح جورنال الاهرام .. لقيت اعلان من الحكومة الايطالية لجميع الايطاليين في مصر

بتحثهم فيه على التوجه الى السفارة الايطالية .. للمشاركة الفعالة في اختيار رئيس وزراء جديد لايطاليا .

و عليهم ابراز جوازات سفرهم وبطاقاتهم .. للمشاركة في الانتخابات الايطالية ..

ولما فتحت الاخبار .. تاني يوم ..

لقيت نفس الاعلان ..

اللي كان موجود ايضا في المصري اليوم .

و لمـّا فكرت شوية ..

بدأت اسأل نفسي ..

ياترى بيصرفوا كام على اعلان زي ده في دول العالم المختلفة ..

يعني اعلان عن انتخابات ايطالية والاقتراع في السفارة الايطالية .. لدى جمهورية مصر العربية .

في 3 جرايد مصرية كبرى ..

ده معناه .. ان على القليل .. 150 الف جنيه في مصر ..

يعني حوالي 25 الف دولار ..

لما نضرب المبلغ ده .. وده مبلغ اساسا مصري ..

يعني استحالة يكون الاعلان بالمبلغ ده في الدول التانية ..

يعني الاعلان في جورنال في اليابان مثلا .. ممكن يتكلف 40 الف دولار بنفس الحجم ده

"وده في جورنال واحد بس"

ولازم تكون حاجز قبله بشهرين ..

احنا بنقول بالمعدل المصري

لو ضربنا مبلغ 25 الف دولار في على الاقل 150 دولة

يبقى الناتج ..

حوالي 4 مليون دولار في اليوم

وده طبعا بقليل القليل ..

انا ساعتها قلقت .. اكيد الايطاليين دول معاهم فلوس ..

بس واحد صاحبي قالي لا يا غبي ..

دي الدول المحترمة كلها بتعمل كده ..

قلتله يعني احنا بنعمل كده ؟؟

قالي بقوللك الدول المحترمة ..

قلتله تقصد ان احنا دولة مش محترمة ؟؟ .. قالي لا ما تودينيش في داهية ..

انا قلت انهم هما اللي محترمين ..

قلتله طيب هي ايطاليا بتعمل كده ليه ؟؟ يمكن معاهم فلوس زيادة ؟؟

قالي لا

لأن ايطاليا دولة بتحترم مواطنيها في كل دول العالم ..

طالما معاه باسبور ايطالي .. يبقى ليه حق على الدولة

قلتله يعني دولتنا مش بتحترم المهاجرين المصريين .

قالي اساسا مش بيحترموا اللي جوه مصر ..

قلتله ايه ده .. !!

هي مش الانتخابات اللي بيقولوا عليها دي بتبقى للناس اللي برة الدولة بس؟؟؟ ..

قالي لأ طبعا ..

قلتله اومال عندنا مش بيعملوهالنا ليه ..؟؟

قالي لأ .. هما بيعملوها .. بس مش بتقدر تصوت غير لما تموت ..

قلتله انا اعرف ان اللي بيموت بيصوّتوا عليه مش هو اللي بيصوت ..

قالي لأ .. في مصر .. الميت هو اللي بيصوّت ..

قلتله يعني الميتين مش بيصوتوا في ايطاليا .. ؟

قالي لأ .. ماهو ده ضمن احترام المواطن .. لازم المواطن يقول رأيه وهو حي ..

قلتله يمكن عندنا بيدوروا علينا لما نموت علشان نقول رأينا اللي ملحقناش نقوله واحنا عايشين ..؟؟

قالي ما تجننيش .. انت لا بتقول رأيك وانت حي .. ولا وانت ميت ..

قلتله .. طيب ليه مش بيعملولنا اعلانات علشان نعرف معاد الانتخابات ..؟؟

قالي لأ بيعملوا ..

قلتله يبقى احنا محترمين ..

قالي انت رحت انتخابات قبل كده ؟؟

قلتله لأ ..

قالي ليه ؟؟

قلتله لأن لازم يبقى معايا بطاقة انتخابية ..

قالي وليه مش معاك بطاقة انتخابية ؟؟

قلتله لان ممكن اطلعها خلال شهر واحد بس خلال السنه

قالي يبقى ده احترام ؟؟

قلتله اه طبعا .. احنا بس اللي مش بنلحق نطلعها في الشهر ده ..

قالي ليه ؟؟

قلتله علشان انا مولود في الدقي .. وعايش في النزهه ..

لما اروح القسم في النزهه .. يقولولي لأ .. من محل الولاده ..

ولما اروح محل الولاده .. يقولولي لأ .. تطلعها من مكان السكن في البطاقة .

وبصراحة انا حاولت لمدة 15 يوم ..

وقعدت اتعالج من التعب لمده 15 يوم .. فما لحقتش ..

قالي وده يبقى احترام ؟؟

قلتله اه طبعا ..

الدولة مالهاش اي ذنب في ان انا تعبت .. من المشاوير بين النزهه والدقي ..

قالي بقوللك ايه ..

انا زهقت منك .. انت مش فاهم حاجة ..انت غبي

قلتله ليه يعني.. شايفني جبت 14% في ثانويه عامه زي ناس؟؟

الراجل اغمى عليه و غاب عن الوعي

هو انا قلت حاجه؟؟