إعتذار واجب

أبنائي الأعزاء..

أكتب إليكم النهارده بعد 5 شهور من الثورة، و بصراحه مكسوف منكم أوي، ومش عارف أودي وشي منكم فين.

لما قامت الثورة كنت فرحان جدا إني ببنيلكم مستقبلكم بأيدي، بس دلوقتي أنا مش عارف مستقبلكم شكله إيه و مش عايز أعرف.

لما قامت الثورة قلت الحمدلله .. دلوقتي أقدر أرجع فلوسكم اللي سرقوها مني، دلوقتي أعرف أحطلكم قواعد تعيشوا بيها، لا ظابط يقل أدبه عليكم، ولا حاكم ييجي غصب عنكم، ولا تتكسفوا تقولوا رأيكم، ولا تخافوا تدخلوا الجامع تحضروا درس، و ما تدفعوش رشوه، ولا تشوفوا فساد.

بس بعد 5 شهور لقيت حاجه غريبة جدا، فلوسكم مش هترجع لأن اللي سرقها ما إتحاكمش، و الظباط بيقلوا أدبهم علينا و بيشتمونا و يضربونا، و بنتكسف نقول رأينا لا يقولوا علينا بلطجيه و يحاكمونا عسكريا، و بنخاف ندخل نسمع درس ف الجامع، مش بسبب أمن الدولة انما بسبب أمن الدين، و بندفع رشاوي أكتر، و الفساد زي ما يكون مريض حصلتله انتكاسة فساد، و رجع الفساد أشرس.

دلوقتي انا مش عارف أتخيل مستقبلكم شكله إيه، دلوقتي أنا مش عارف الثورة كان سببها أيه، دلوقتي أنا مش عارف إن كان في ثورة أصلا، دلوقتي أنا شايف الناس بتكفـر بالثورة، دلوقتي انا شايف أمهات الشهداء بيهينوهم.

و عشان كده أنا كان لازم اتأسفلكم..

لأن أهون عليا مليون مرة إنكم تقولوا إن أبونا كان سلبي.. و ما تقولوش أبونا كان حمار.