جالك بوسطجي قبل كده؟
سمعته بينادي على اسمك و يقول بوسطاااا ؟
طيب حسيت بأيه؟
بتحس انك قلقان و يمكن خايف شويه و بردو سعيد، احيانا بتحس بلمسة غرور لأن البوسطجي جايلك انت مخصوص من وسط كل سكان البيت، لا من وسط كل سكان العمارة
واحيانا بتكون انت الوحيد اللي جاله بوسطا في الحي بتاعك
بتحس بفضول توتر تسرع صربعه. بتجري على البوسطجي بسرعه تقلب فى المظروف، تدور و تشوف مين اللي افتكرك، طيب مين اللي باعتلك مخصوص؟ طيب يا ترى الجواب فيه ايه؟
بتحس للحظه لما تمسك المظروف ان كل الدنيا اختفت من حولك.
انت، و المظروف اللي في ايدك.
طيب عمرك وقفت تسأل البوسطجي انت اسمك ايه؟
عمرك وقفت تهرج مع البوسطجي و تتعرف عليه؟
مع ان هو اللي جايب الجواب
مع ان هو اللي خلى كل الاحاسيس دي تظهر.
بس دايما البوسطجي ده اخر واحد بنفكر فيه،
و غالبا ما بنفتكرش اساسا شكل البوسطجي اللي جابلنا الجواب
مافيش علاقه انسانيه فاشله
مفيش حب فاشل
مفيش صداقه فاشله
مفيش قرابه فاشله
انما في رسائل.. و بوسطا كتيييييير جدا
ولازم تطلع من كل علاقه
تفكر في الرساله
و اخر حاجه لازم تفكر فيها
...هي البوسـطـجـــــي
